Dossier - O Deseño curricular das linguas estranxeiras

Ola de novo!

Na seguinte entrada vouvos ensinar algo moito máis interactivo que a primeira entrada, centrada na evolución das linguas estranxeiras en España durante o século XX. A temática da presente entrada é o uso de diferentes aplicacións e actividades na aula para tratar o tema do deseño curricular das linguas estranxeiras na ESO, Bacharelato, FP e Escolas Oficiais de Idiomas. En concreto, vou centrarme en 3 actividades diferentes: Kahoot, debates piramidais e Google Docs.

Se só coñecedes os debates clásicos, nos que pouca xente aporta opinións, tedes que coñecer os debates piramidais. Estes céntranse en partir dun grupo pequeño (grupos de 2 persoas, por exemplo) e ir aumentando os grupos a medida que avanza o tempo ata rematar co grupo completo. Desta maneira, asegurámosnos de que todo o mundo participe, incluídas todas as persoas que poidan ter máis vergoña á hora de falar en grupo. En concreto, fixemos un debate piramidal para falar das competencias que debería ter o persoal docente e cales son os elementos curriculares máis importantes. Recomendo moito o seu uso xa que así se coñecen os puntos de vista de todo o alumnado e os contidos son máis fáciles de recordar. No noso caso, serviu para saber os coñecementos que tiñamos sobre o tema, e ao mesmo tempo aprender dos nosos iguais e do profesorado -xa que, despois de chegar a unha conclusión entre toda a clase, o docente mostrounos información sobre os temas a debatir. Das tres actividades, considero que é a que mellor funcionou conmigo, xa que co debate despertouse o meu interés polos temas e fíxome pensar neles, e despois ampliáronse os mesmos coa explicación do profesor.

En segundo lugar, gustaríame falarvos de Kahoot, unha aplicación moi interesante que está dispoñible para navegadores web como en aplicacións móviles (iOs e Android). Con ela, conséguese que ata a temática máis densa e aburrida resulte interesante e máis fácil de aprender. Baséase nun test con todas as preguntas que se queiran crear. Primeiro, o alumnado pode ler a pregunta durante uns segundos. Despois, ten un breve tempo para ver as opcións de resposta. Por último, ten que responder no menor tempo posible para gañar o maior numero de puntos e, se acerta varias preguntas consecutivas, gañará puntos extra. Deste modo, fomentase a competitividade e a toma rápida de decisións sen ter en conta que se está aprendendo inconscientemente, convertíndoo nunha aplicación moi interesante. Ademais, conseguese incorporar os teléfonos móbiles e a tecnoloxía en xeral nas clases, dándolle un valor educativo e suprimindo a connotación que teñen de distracción. Nós usámola para tratar o currículo na ensinanza secundaria, e foi moi útil, aínda que ás veces non se pensé demasiado na pregunta debido ao pouco tempo que se habilita para iso. Gustaríame que o tempo de lectura das preguntas e as respostas fose un pouco superior, xa que axudaría máis a non responder para gañar e sí para aprender, aínda que a competitividade se reducira un pouco.

Por último, quérovos comentar o noso uso de Google Docs xa que tamén podería ser interesante para aplicar nas aulas. O docente propúxonos o tema das linguas estranxeiras na LOMCE, tendo que completar un documento de Google Docs entre todos. Para iso, dividiusa a clase en grupos para que cada grupo traballara nunha temática diferente. O noso grupo tivo que abordar as linguas estranxeiras na Formación Profesional Básica, tendo moitas dificultades á hora de encontrar a información. Entre os puntos positivos gustaríame destacar que axuda a fomentar o traballo en equipo, ademáis de que buscando e traballando a información é máis sinxelo recordala. Por outra parte, entre os puntos negativos, a falta de información converteu esta actividade nun desafío, sumado a que é a actividade menos interactiva das tres comentadas. Por sorte, despois da busca de información, houbo un período de presentación para saber que encontraron o resto dos grupos e a posterior información presentada polo profesor, facendo que fose moito máis completa.

Déixovos un vídeo con máis información sobre a aplicación.

Tras a explicación das tres actividades, gustaríame concluír dicindo que, a pesar de que as actividades poidan ter puntos negativos, todas serviron para acadar os obxectivos que tiñan. Axudáronme a ter máis interese pola materia, xa que esta temática é bastante complexa, e a que se me quedasen contidos máis fácilmente que cunha explicación maxistral ou lendo uns apuntes. Se queredes saber máis sobre estas actividades, podedes consultar o blog da miña compañeira Antía.

Ata a próxima entrada!